ANIMO, one hit wonder band

"Des Gens Stricts" ("Monde Estricte"), capitada sense endoman en 1988 entau grop Francés "Animo".

Des Gens Stricts

Gessit de la scèna punk Francesa, un escur grop Parisenc que se sonava "Veuve Mao" ("Veusa Mao") decidèc tardivament de's virar cap a ua pòp mès sintetica en mila-nau-cent-qüate-vint-sièis (1986) ; cambiament d'estili, cambiament de nom : atau "Veuve Mao" devengoc "Animo" (un mot espanhòu que vòu díser "aver vam"), e en seguida t'enregistrèran de cap la fin de las annadas qüate-vints quauques simples e quitament un albom sancèr ; t'an alavetz conegut ua corta periòda de glòria l'espaci d'ua annada, la de mila-nau-cent-qüate-vint-uèit (1988), gràcias au tube "Des Gens Stricts" ("Monde Estricte"). Aquesta capitada lor a permés pendent tota aquesta annada de mila-nau-cent-qüate-vint-uèit (1988) ua fòrta mediatisacion, plan visuala, que t'èran convidats sus totes los platèus de la televison franchimanda per'mor tanben que jogavan de plan de lor imatge "brancat", ajudat que n'èran deu carisma naturau deu cantaire, Alain Magallon.

Alain Magallon

Sortit au mès de heurèr de mila-nau-cent-qüate-vint-uèit (1988), lo simple "Des Gens Stricts", que beneficièc tan plan d'ua vidèo promocionala professionala adobada per Gerard Pullicino, plan reconegut, auèi encara, deu mitant audiovisuau en França, te  pujèc dincas a la trentièma plaça deu "Top 50" Francés au més d'abriu. A-n'aquesta periòda, lo grop t'èra devengut incontornable a la televison Francesa, que a la medisha periòda, mentre que lor títou "Des Gens Strict" t'èra un tube, òm podèva tanben véder los sòcis de Animo dins ua auta video, la deu tube "À caus' des garçons" (deu duo femenin "À Caus' des Garçons"), qu'era tanben adobada... peu Gérard Pullicino !

Des Gens Stricts (vidèo de Gérard Pullicino)

Malastrosament, lo fenomèn mediactic audiovisuau Animo de l'annada de mila-nau-cent-qüate-vint-uèit (1988) sufisèc pas a les impausar durablament, e aquesta quita plan bona presença dins los medias audiovisuaus franceses permetèc pas aus autes simples que van sortir en seguida dincas en mila-nau-cent-qüate-vint-dètz (1990) de conéguer ua capitada comparabla a la deu títou "Des Gens Stricts".

Atau, "Mannequin de Studio" ("Manequin d'Estúdio"), "Bandit-Bandit" e "Voyage à l'envers" ("Viatge au denvèrs") avoren pas nat succès maugrat ua mediatisacion mès qu'onorabla ! l'albom, eth, avoc ua relativa capitada, mès ua capitada solide qu'èra pas qu'un resson de la deu simple "Des Gens Stricts".

 

Mannequin de Studio

Bandit-Bandit

Voyage à l'envers

Fin finala, lo grop se desseparèc lèu-lèu en hèr capbussar lo projècte d'un segond album. Lo cantaire Alain Magallon t'ensajèc plan de sortir un albom solet, mès aqueste còp, avoc pas nat resson enlòc. Alavètz, cambièc lo fusil d'espatla, deishèc caiger la musica e't partiscoc hèr ua carrièra de pintre en Anglatèrra.